Vanessa Paulina ta regala biblioteca su obra ‘Los Nubia’
21/05/2018
Vanessa Paulina, artista local, a regala biblioteca un obra titula ‘Los Nubia’ for di e serie titula ‘Tambu: e Instrumento prohibi’. Esaki ta bay pa e coleccion di arte di biblioteca y ta keda presenta den edificio principal di biblioteca pa asina publico por admira arte local.
Vanessa ta conta algo di su inspiracion pa traha e obra aki: “e cuadra ta parti di un serie cu mi a haci di ‘Tambu: e Instrumento prohibi’, esaki tabata e caso tempo di esclabitud, e shonnan tabata spanta ora e esclabonan tabata haci e baile cu nan no tabata compronde y nan a para esaki y ta te na 1952 nan a bolbe legalisa Tambu na Corsou. Con cu bay bin, a keda tene encuentronan di Tambu scondi.
Mi inspiracion tabata e tesis di Rene Rosalia (ex-director di Cas di Cultura na Corsou) caminda tur esaki ta wordo splica y cu entrevistanan haci na varios islanan incluyendo Corsou, Boneiro, Aruba y Venezuela. ‘Los Nubia’ ta loke nan tabata yama e tambulero cu tabata subi sero y toca Tambu pa pone awacero cay, esaki pa medio di e ritmo di e Tambu. Mi mes tabatin e honor di a topa cu un Tambulero cu e don di haci esaki na Corsou, un meneer di edad basta halto, tabata algo cu e esclabonan a trece for di Africa.”
Entre 1990 y 1994 Vanessa a studia fashion y ilustracion na Willem de Kooning Art Academy na Rotterdam. Prome cu esaki el a studia na Mode Academie Eindhoven, di 1989 pa 1990. Na Windroos na Rotterdam, el a gradua como mihor studiante. Pa sostene su esfuersonan artistico el a tuma les tambe di historia di Caribe na Universidad di Leiden y a la vez un curso Business na Atlas, Rotterdam. Vanessa ta traha como stilista y diseñador y ilustrador banda di su pintamento. Vanessa a traha pa diferente revista na Hulanda manera BLVD y Dutch, tambe fashion shows y video clips pa Hips and Delidel Touch y pa programanan di television manera e serie Westenwind y e show conoci ‘Raymann is laat’. Vanessa a yega di duna diferente workshop di pintamento y fashion design, tanto na Aruba y Corsou como na Hulanda. Mas informacion di e artista por lesa riba www.vanessapaulina.com
Scroll To Top