Amistad! Traha storia hunto…
08/03/2018
Actividadnan di Festival di Buki pa Mucha 2018 lo ta den luz di e tema di Amistad. Pa comunica e tema bon cla na tur scol y mucha ta scohe un lema cada aña. E aña aki e lema ta ‘Amistad! Traha storia hunto…‘. Esaki ta un tema cu por haci hopi cu ne y biblioteca ta pidi tur hende cu ta traha cu mucha pa ta creativo den duna contenido na e tema. E tema sigur ta reconocibel pa un y tur. Nos ta disfruta di amistad y nos amistadnan ta parti di nos storia. Tin ora tin problema den amistad pero nos mester amistad, realidad di bida. Pesey ta celebra amistad e aña aki.
Inspiracion pa haci algo cu e tema tin hopi y biblioteca lo duna tayer tambe na maestronan di scol basico con pa traha cu e tema aki den buki, contamento di storia y otro expresion. E ta un tema cu nos ta topa cu ne hopi den buki pa hubentud pasobra cera amistad ta algo cu bo ta siña como mucha. Amistad di berdad no conoce ningun barera.
Na Aruba ta sigui e tema cu Stichting CPNB na Hulanda ta stipula pero ta dune un toke crioyo y ta invita autor y ilustrador di region Caribe y otro parti di mundo. Biblioteca tin hopi buki pa mucha cu e tema di ‘Amistad’ na Papiamento, Ingles, Spaño y Hulandes. Nos ta invita mayor y educadornan pa pasa wak e coleccion di biblioteca hubenil of tuma contacto cu Mediateca Escolar. Biblioteca Nacional Aruba ta tene un y tur na haltura di e desaroyonan den organisacion di e festival grandi.
Bukinan cu por lesa ta bukinan di plachi pa e chikitonan manera Kikker en zijn vriendjes (Max Velthuis), Balotje vindt een vriendje (Yvonne Jagtenberg) of Ventje zoekt een vriendje (Ted van Lieshout, Dieter y Ingrid Schubert) of bukinan manera Jij bent mijn vriend di Rindert Kromhout y Jan Jutte, Rosie y Moussa. Beste vrienden voor altijd (Michael de Cock y Judith Vanistendael) of Hoe maak ik een vriend di Evelien de Vlieger. Corda cu na biblioteca tin hopi buki na Papiamento.
Pa mucha mas grandi te 12 aña Anke Kranendonk a skirbi Lynn 2.0 y Anna Woltz a skirbi Evi, Nick en ik y Harm de Jonge tin un buki titula De geschiedenis van een vriendschap. Parti di e tema ta e amistad entre hende y bestia. Ehempelnan ta e clasico y ganador di premio Jody en het hertejong (Marjorie Kinnan Rawlings) of mas recien Toen kwam Sam (Edward van de Vendel).
Scroll To Top