Artista Agnes Leslie cu exposicion ‘Serenidad’
14/06/2018
Artista Agnes Leslie a habri su exposicion na MFA Noord y sra. Leslie ta invita un y tur pa pasa bishita e exposicion. E exposicion ta carga e titulo ‘Serenidad’ y ta un coleccion di cuadra. Esaki ta keda habri te fin di augustus.
Agnes Leslie ta docente di arte trahando den enseñansa pa mas cu 35 aña caba. El a caba su estudio na Academie voor de Hoge kunsten na Utrecht, Hulanda na 1986. Agnes ta exhibi su obranan regularmente, e ta participa na exposicion di grupo y tambe solo. Tanto local como den exterior. Arte y skirbi storia cortico ta su pasion. Den su obranan tin un storia of mensahe y e ta gusta usa materialnan special cu e ta haya diferente caminda. Asina e ta participa den exposicion di Arte recicla, tambe pa mustra kico tur por haci cu e material y duna e material of obheto e un di dos bida.
E exposicion aki ta na MFA Noord ‘Titi Tromp’ den e proximo simannan pa un y tur bishita. Un invitacion cordial na pueblo di Aruba pa pasa bishita MFA Noord y disfruta di e bunita obranan.
MFA Noord ta brinda servicio di gobierno mas cerca di cas pa pueblo di Noord. Tin espacio pa organisa encuentro y presentacion y charla. Tambe tin espacio pa exposicion y un biblioteca chikito y tin WIFI.
Un entrevista cu Agnes…
E exposicion ta consisti di cuadra y kico ta e material cu bo a usa? “E exposicion aki ta consisti di 21 obra. No tur obra ta cuadra den e sentido general. Mi a usa material recicla y obhetonan recicla, acryl verf, tela entre otro, pero tambe tin cuadra pinta riba canvas.”
Pakico bo a scohe e tema aki? Abo ta buscando ‘serenidad’ of bo kier expresa bo ‘serenidad’ pa medio di bo obranan? “Pa bisa berdad, mi no a scohe. E tema ta algo cu ta parti di mi. Biniendo di un famia grandi semper mi a gusta di ta mi so. Den e silencio ey mi a desaroya mi creatividad, usando mi fantasia y tur material cu mi tabatin. E sentimentonan ey mi ta transmiti den mi obra. Ta pesey tambe mi ta usa diferente material. Mi no ta limita mi mes na verf of otro material convencional.
Kico ta bo temanan favorito, formanan y colornan favorito? Kico ta bo estilo?
“Emocion, hende. Cualkier forma ta capta mi atencion. Hopi biaha mi descansa door di sinta of drumi den frescura y wak ariba y mira con biento ta forma obranan precioso den cielo. Alabes ta hopi, dushi mes pa sinta wak lama. Ademas blau-berde ta mi color favorito, den tur su ‘shades’, scur, medio scur, cla…
Dicon bo a scohe pa e pone un exposicion na MFA Noord? “Mi tawata tin un exposicion na MFA Savaneta cu bon acogida y e manager di eynan a recomenda pa mi bay MFA Noord despues.”
E exposicion ta bay otro caminda tambe? “Si e intencion ta pa tene exposicion den un otro bario”
Con bo ta set-up un exposicion y bo ta haya ayudo? “Sigur bo mester tin un plan, un ‘layout’ den cual bo tin bo coleccion tentativamente colga. Cuanto meter cuadra di muraya bo tin. Cuanto obra, cua obra ta prome, cua ta sigi ect. E haltura di colga e obranan na muraya. Con bo ta colga nan. Ayudo semper ta bon bini: pa yuda colga of como refleccion.”
Bo tin un studio caminda bo ta traha? “Mi tin un espacio na cas unda mi ta traha. Mi tin un otro posibilidad pafo di cas, pero hopi biaha si bo haya e ‘kriebels’ pa sigi crea madruga bo no por yega na bo obranan. Na cas bo por traha 24/7.”
Bo ta traha cu otro tipo di material tambe? Nos a wak bo obranan den exposicion di Arte Recicla di AHATA su exposicion di Arte Recicla? “Si, mi ta traha cu canvas, papel, verf, palo ect. Lo cual e obra ta pidi. Den pasado mi tawata welder mi obranan ya cu mi ta un welder diploma (Phillips).”
Bo a sigui workshop na Ateliers ’89. Cua tabata e workshop cu bo a enjoy mas hopi y pakico? “Bon tur di nan mi a enjoy masha hopi mes. Bo ta “work”, pero mas ainda bo ta “shop”: esey kier men, bo ta intercambia hopi creatividad. Den un luna di tempo bo tin cu yega na un obra cu lo forma parti di un coleccion di obranan di diferente individuo. E grupo ta hopi varia; hende grandi, hoben y mucha di 12 aña pariba. Ademas e docentenan ta bin di tur caminda di mundo.” Awor aki tin un di Italia y un di Grecia.
Kico mas lo bo kier siña como artista? “Saca portretnan profesional di mi obranan”
Biografia cortico:
Agnes Leslie a nace na Aruba na 1955. Despues di su estudio na APA (Arubaanse Pedagogische Akademie) y Biologia y Geografia na ALO (Antilliaanse Lerarenopleiding) e a bay studia Arte na Hulanda. Arte tawata semper su pasion. E a gradua na januari 1986 como docente di Arte na Akademie voor Beeldende Kunsten Utrecht cu honor y a wordo recomenda pa aplica pa un ‘’startstipendium’’ door di Ministerio di Hulanda (WVC).
Agnes a caba su studio cu un colecion di mesa y stul inusual. Na e mes un aña cu el a gradua el a wordo invita pa participa den diferente exposicion cu su obranan. Entre otro den Jaarbeurs Utrecht, Rai Amsterdam y na Kortrijk, Belgica.
Na Hulanda el a usa arte pa guia y coach mucha den diferente scol y establicamento (Jeugd Hulpverleningverlening y Vormingscentra) y adulto den Centro di Bario. Na 1998 el a regresa Aruba y a traha na un scol na San Nicolas. Despues di 7 aña el a bay traha pa Departamento di Ensenansa Aruba.
Den su tempo liber Agnes a participa den diferente competencianan di arte recicla y competencia di skirbi storia cortico. El a gana diferente premio cu su arte, pero tambe cu su storianan cortico na Aruba y na Hulanda. Su ultimo storia “Karel” ta forma parti di e colecion “Krese den libertat” – Simia Literario Amsterdam, 2016
Despues cu Agnes a baha cu pensioen el a duna les pa un temporado na Colegio Arubano Oranjestad y San Nicolas. Ademas el a guia e studiantenan di Colegio San Nicolas cu nan obranan pa Aruba Art Fair 2017.
Agnes a expone su obranan na diferente lugar na Aruba entre otro na CEDEHM, e centro pa desaroya di hende muhe.