Arubiana

BNA – Biblioteca Nacional Aruba

Departamento Arubiana di Biblioteca Nacional Aruba ta e caha di tesoro cultural di documento original, escrito y produccion cu ta forma parti di nos memoria colectivo. Arubiana ta conserva nos historia social, cultural, politico y economico. E departamento tin e encargo di colecciona, warda, organisa y preserva e herencia documental di Aruba y pone esaki  na disposicion di comunidad.

Departamento di Arubiana/Caribiana tin e siguiente coleccionnan:

COLECCION NACIONAL

Pa cumpli cu e tarea di conserva nos patrimonio, a crea e departamento Arubiana cu ta colecciona tur buki y documento cu ta trata Aruba of ta skirbi pa un persona naci of biba na Aruba, manera: manuscrito, pamfleta, buki, corant, video, potret, pues tur portador di creacion intelectual. Tambe ta colecciona publicacion tocante Aruba publica den exterior. Ta compila informacion riba diferente tereno, manera: arte, musica, deporte y politica. Un coleccion valioso ta e coleccion di revista y corant local y e coleccion di medio audiovisual di Aruba, cual ta consisti di entre otro: video, pelicula, diapositivo y potret. Un seccion di e material ta proteha y por uza solamente pa meta investigativo.

COLECCION “ANTIGUO”

Arubiana tin buki y documento antiguo cu ta data for di aña 1600. E bukinan den e coleccion aki tin balor historico grandi pa nos paisnan y tambe pa nan forma di
encuadernacion antiguo.

COLECCION ANTILLIANA, CARIBIANA Y DI SURINAM
Tin buki, revista, foyeto y un seleccion di recorte di actualidad, saca for di revista y corant cu tin informacion tocante e Islanan di Caribe Hulandes, Surinam y resto di region di Caribe. Parti di e coleccion aki ta trata tambe di Aruba den e periodo prome cu Status Aparte.

COLECCION HARTOG

Dr. Johan Hartog tabata e prome persona cu a fungi como bibliotecario na Aruba. E ta conoci tambe pa su bukinan tocante historia di e seis islanan. Su coleccion ta di hopi balor pa Aruba, pa motibo cu e ta contene mapa bieu, recorte di articulo tocante Aruba y otro documento historico. E herencia di Dr. J. Hartog a bira parti di nos coleccion.

COLECCION ITO TROMP

E coleccion ta consisti di documento etnografico, pues historia oral, investigacion, partitura di musica di nos compositornan, manuscrito di Rufo Wever, un cantidad grandi di poema y algun storia di nos autornan cu nunca a keda publica. E coleccion a bira parti di Arubiana, ora cu Departamento pa Cultura y Educacion a cera na fin di aña 1985.

PUBLICACION DI GOBIERNO

Ta contene rapport, relato anual y otro publicacion di diferente departamento di gobierno y otro instancia no-gubernamental. Den e coleccion ta ofrece, por ehempel, documento cu ta data for di aña 1900, e Relatonan di Parlamento tanto di Antiya Hulandes como di Aruba y “Landscourant Aruba”.

COLECCION DIGITAL

Actualmente, Arubiana ta den proceso di digitalisa su documentonan. Tin computer disponibel pa lesa y busca informacion den forma digital. Tin: revista, manera Skol i Komunidat, corant, manera Arubaansche Courant di 1948-1967 y corant mas reciente, diferente tipo di rapport, coleccion di potret, manera slide di coleccion Vredebregt, y diferente tesis

COLECCION LAGO

E departamento tin un coleccion extenso di Lago, cual ta consisti di, entro otro: mas di binti mil imagen, documento, material audiovisual, buki, corant, corespondencia, artefacto y articulo. Tambe ta dispone di material digital tocante Lago, manera articulo publica den corant di exterior. Investigador, studiante di nivel secundario y avansa, escritor, artista y tur interesado cu ta busca inspiracion den nos patrimonio cultural ta bonbini na nos departamento. No mester ta miembro pa por lesa y consulta e material cu tin, pero mester tene cuenta cu no ta fia ningun material. Sinembargo, ta posibel pa saca fotocopia, semper teniendo cuenta cu derecho di autor. Mester tene cuenta cu den cierto caso lo por pidi identificacion.

The English version

Scroll To Top

Newsletter