Clausura proyecto Conta cuenta

29/06/2018

Biblioteca Nacional Aruba a clausura otro edicion di su proyecto ‘Conta cuenta na Casnan di nos Grandinan’. E biaha aki e gira tabata cu autor Marco Christiaans, actriz y docente sra. Emerita Emerencia y actriz sra. Faritah Luidens. Emerita Emerencia a entretene su publico cu un storia di dos popchi, Faritah Luidens a presenta un sketch den e rol di Tica Basha Bou, tocante con nos hendenan tabata biba antes y el a canta canticanan di antes. Marco Christiaans a conta storia di schutterij y storia di Noord di antes.

Biblioteca Nacional Aruba ta organisa e programa aki tur aña. Durante 3 luna hunto cu autor, poeta y contador di storia ta bishita e diferente casnan di grandinan pa presenta un progama di un ora cu storia, poesia, obra teatral y musica y entretenimento.

Den e di dos parti di e programa ta ofrece un ‘recuerdo’ tocante custumbernan di antes presenta den forma di sketch pa algun empleado di biblioteca, cu acompaño musical di sr. Patrick Christiaans conhuntamente cu sra Setti Yarzagaray cua forece voluntariamente pa asisti na e grupo musical. Na Clausura esaki tabata un celebracion di Fiesta di San Juan. E grupo a bishita diferente Cas di nos Grandinan manera e.o. Paviljoen San Pedro, Huize Maris Stella Savaneta, SABA San Nicolas y Cas Marie Savaneta.

Coordinacion di e proyecto ‘Conta Cuenta Na Casnan di Anciano’ ta den man di un bibliotecaria y Quota Club Aruba ta ofrece un contribucion financiero pa cubri algun gasto. Un danki di curason na tur cu di un of otro forma a contribui na e exito di e programa.