‘Rendezvous’ y ‘Mi tin dos: buki di poesia’
23/02/2018
Reginald de Palm, poeta local, ta skirbi poema y tambe storianan cortico. Reginald a publica dos buki poesia. E ultimo publicacion di e poeta y escritor ta un compilacion di algun storia cortico titula ‘Rendezvous in San Nicolas: short stories’. Reginald ta presenta e obra aki diasabra dia 26 di augustus durante un evento organisa pa ‘We Culture’ na Promenade San Nicolas. Esaki ta cuminsa 7or di anochi.
E poeta a conta nos cu hopi di e storianan aki ta inspira riba soño, tin biaha riba cosnan cu ta pasa den bida diario y tin biaha e inspiracion ta bin for di un situacion na trabou. E buki ta obtenibel online y cerca e autor mes. Tambe e anochi di e evento diasabra dia 26 di augustus.
Na januari, despues di 3 aña cu Reginald de Palm a debuta oficial como poeta, Reginald a presenta su di dos coleccion di poema titula ‘Mi tin dos: buki di poesia’. Segun e poeta local esaki ta e di dos publicacion den un serie di tres buki di poesia. Asina e ta indica cu tin mas expresion poetico ta brota y ta tene su publico den suspenso.
Reginald de Palm ta pintor tambe y publico por wak algun di su ultimo cuadranan na biblioteca San Nicolas, obranan cu diferente tema y composicion. Biblioteca San Nicolas ta situa temporalmente den edificio di ex-SINFA, B. V.d. Veen Zeppenfeldtstraat 10/11. Amantenan di poesia y arte visual ta bon bini.
Na december 2013, Reginald “Quake” de Palm a presenta su prome buki na Biblioteca Nacional Aruba. Un obra di poesia titula ‘Kita paña fo’i cabuya’, cu ta contene riba 100 poema cu Reginald de Palm a skirbi den periodo di 2002 y 2012. Reginald de Palm a nace na Aruba, for di mayornan di Boneiro y Corsou y a biba na tur tres isla. E ta un hurista y den su tempo liber ta skirbi poesia, pinta y ta composita cantica.
www.reginalddepalm.com
