Simposio Papiamento, 26 y 27 di oktober
01/10/2018
Conferencia na ocasion di 15 aña di Papiamento como idioma oficial. Papiamento tin un status oficial na Aruba, Boneiro y Corsou. Na 2018 nos ta celebra cu na Aruba ya ta 15 aña cu Papiamento tin un status oficial. Plataforma Union di Papiamento ta organisa un simposio di dos dia pa pone atencion riba Papiamento pa aporta na su desaroyo.
Plataforma Union di Papiamento a keda funda na 2012 y tabata consisti originalmente di Fundacion Lanta Papiamentu (Aruba), Fundashon Akademia Papiamentu (Bonaire), Instituto Alsa Papiamentu (Curaçao) en Fundashon SPLIKA (Nederland). Na 2014 Fundashon Dushi Papiamentu (Bonaire) tambe a bira miembro. Meta di Plataforma Union di Papiamento ta pa traha hunto pa promove, enforsa y desaroya Papiamento.
Meta
Cu e simposio aki Plataforma ta enfoca riba e siguiente metanan:
a. Atencion amplio pa cuido di Papiamento
b. Sosten pa realisa un Union di Idioma Papiamento, cu Plataforma cu organo di deliberacion
c. Sosten pa introduccion di Papiamento como idioma di instruccion den enseñansa
Luga di conferencia:
Biblioteca Nacional Aruba, George Madurostraat 13, Oranjestad
Inscripcion: (567-4699)
AWG. 15,00 pa dia 26 di october
AWG. 25,00 pa dia 27 di october
Studiante: AWG. 20,00 pa tur dos dia hunto
Idioma di Conferencia:
Papiamento, cu libertad pa haci uzo di otro idioma
