Storianan di Boneiro

09/10/2019

Pa e Festival di Buki pa Mucha, Biblioteca Nacional Aruba a invita dos autor femenino  di Boneiro, Denise de Jongh- Rekwest y Xiomara Frans-Muller.

Sra. Denise de Jongh-Rekwest, “un biaha mas tin e placer di forma parti di Festival di buki pa Mucha na Aruba” manera e mes ta bisa. Denise a nace na Corsou y  ta biba na Boneiro. Denise ta experto riba tereno di turismo y etiketa. Denise ta skirbi y publica buki pa su mes anto tambe pa diferente otro autor di Aruba, Boneiro, Corsou y Hulanda via su propio empresa di publicacion Request Publishing.

Durante Festival di Buki pa Mucha 2019, Denise cu hopi cariño lo presenta su buki nobo ‘Bin, bin, sigui mi submarin’. Tur scol basico di Aruba lo ricibi e buki aki regalo. Cu ‘Bin, bin, sigui mi submarin e’ autor ke yuda conscientisa mucha cu nos tur mester cuida nos medio ambiente. E cuenta ta motiva mucha pa evita uzo di plastic, haci uzo di reciclahe y tene nos islanan limpi. E mucha ta lesa pa e diberti y na mes momento e ta siña cu tene su ambiente limpi ta un actitud positivo y duradero. ‘Bin, bin, sigui mi submarin’ ta contribui grandemente na desaroyo sostenibel di medio ambiente. Pa sa mas di Denise de Jongh por bishita su website www.requestpublishing.com

Otro invitado cu biblioteca ta spera di Boneiro ta sra. Xiomara Frans-Muller.Sra, Xiomara ta maestra di scol, a nace na Aruba  y a biba na Aruba, Corsou y Boneiro. Sra. Xiomara tambe ta haya lesamento masha importante pesey e ta coy un avion pa bin conta e muchanan di Aruba storia. E ta spera cu e por stimula mucha pa lesa mas storia.

Apertura di e Festival di Buki pa Mucha ta diabierna dia 1 di November na Cas di Cultura. Porta ta habri 6or. Den siman di dia 4 pa dia 7 di November tin actividad pa tur mucha di 3or pa 4or di atardi na biblioteca na Playa y San Nicolas.

Scroll To Top

Newsletter