Buki cu 16 storia y poema historico pa mucha
26/10/2020
‘Ora Ubao’ ta un buki cu 16 storia y poema historico pa mucha entre edad di 4 pa 12 aña. Den cuadro di e Festival di buki pa mucha 2020 por haya e buki gratuitamente na tur libreria ora di cumpra un buki pa mucha, tanten cu tin.
Pa su Festival di Buki pa Mucha, Biblioteca Nacional Aruba a produci un buki pa mucha. Esaki hunto cu Levendig Uitgeverij na Hulanda. E publicacion ta na 2 idioma, Papiamento y Hulandes. Escritornan di e buki pa mucha ta: Liliana Erasmus, Jeroen Hoogerwerf, Lizzy van Pelt y Robert Reeberg. Ilustracionnan ta di artista visual Elvis Tromp.
E buki ta na 2 idioma, na Hulandes e titulo ta ‘Schelpeneiland’. E buki ta bay pa tur scol particpante y ta gratis pa e scolnan aki. Asina biblioteca ta percura pa tur mucha por haya e buki pa lesa. Naturalmente mucha por fia e buki na biblioteca.
Tur aña e festival tin un tema cu ta sirbi como inspiracion, e aña aki ‘Historia’ ta e guia pa lesamento. E buki tin un timeline. Storianan ta categorisa pa edad di e mucha.
Contenido: Perdi den scuridad (storia di tempo di indjan), E canoa straño, E cabay cu no kier a landa (un poco historia di Paardenbaai), E tesoronan di Maria Largo, Keintura di oro (poema), E forti y e toren, un receta pa ‘Keshi Yena’, Liber porfin! (storia di sclavitud), Dokter Acho (un storia di Aruba su prome dokter), Sincuria t’un bon sombre (storia di traha sombre), Ma Mona su man (curandero y partera di Aruba), Nos ta traha un kapel nobo (storia di kapel Alto Vista), Fiesta den ciudad, Rey Momo a perde su bril di solo (storia di Carnaval), Arte tur caminda, Nos ta sigui balia y keda canta bay, Temp-o-fon. Ilustracion riba portada tambe ta di Elvis Tromp. Traduccion ta di bibliotecarianan, Lilian Semeleer y Sophiene Maduro-Verhaegh.
Sponsors di Festival di Buki pa Mucha 2020:
Setar NV, Quota International of Aruba, De Wit & Van Dorp, Arugas NV, FCCA, Kiwanis Club of Palm Beach, Plaza Bookshop, PlusAccountants, Century Group, Guardian Group, Qredits, Deloitte, Aruba TV Canal 49.
Scroll To Top