Historia ilustra pa Elvis
02/10/2020
Biblioteca Nacional Aruba ta presenta su Festival di Buki pa Mucha den prome siman di november. Actividadnan di Festival di Buki pa Mucha 2020 ta den cuadro di e tema ‘Historia’. Comision di e festival ta produciendo un buki pa mucha specialmente pa e festival conhuntamente cu Uitgeverij Levendig. Un buki cu lo bay na e scolnan participante. E aña aki nos ta produci un compilacion di diferente storia titula ‘Oro Ubao’. Cada storia a keda ilustra pa artista visual, Elvis Tromp. Na 2019 Elvis a cumpli 50 aña como artista visual. Elvis ta capta e imahennan di cultura di Aruba, historia, paisahe, arquitectura y otro facetanan di un forma bibo, colorido y tipico. Elvis tin su estilo autentico cu bo ta reconoce facil. Elvis a ilustra hopi buki di autor y poeta local. Elvis Tromp a pinta imahen di Aruba su historia pa e publicacion aki. Si bo kier wak mas di Elvis su arte bishita su FB page.
Elvis Tromp a conoce diferente evolucion den su estilo cu e ta aplica den su creacionnan. Inicialmente el a bira conoci pa su pintura (sur) realistico atmosferico y te hasta bo por bisa mistico unda e tabata usa verf di oleo. Den su exposicion “The Quest” na aña 2005 su transformacion, mas madura, a manifesta su mes mas intenso na momento cu, usando e elementonan basico, esta liña, color y espacio, a logra presenta un coleccion abstracto hopi colorido unda cu ya e uso di verf acrilico tabata domina y e figura reconocibel solamente pa un combinacion di liña y color. Elvis su estilo a sigui desaroya durante aña y esaki a bira mas fuerte.
Nos a haci artista Elvis un par di pregunta riba su ilustracionnan:
Elvis, e tema tabata un bon inspiracion pa bo? “Cu e tarea aki mi a siña mas di e historia di Aruba. Hopi di e topiconan ta conoci cerca mi. Mi por a indentifica mi mes cu nan. Na e prome storia … apesar cu e ta trata un parti di nos historia mi a haya e ratonnan di anochi un tema cu ta pas tambe cu actualidad, mirando cu ta wordo sospecha cu nan a bin cu e coronavirus, dus e ta pas un tiki cu e momento.”
Kico lo bo kier pa mucha sa di Aruba su historia? “Mi ta kere ta bon pa nos sa cu nos ta bin for di diferente cultura y cu nos tawatin masha poco material prima, cu nos tawata chikito, pero cu diferente biaha apesar di tur esey Aruba tawata riba mapa mundial, dus cu semper pa chikito cu por ta toch bo por logra hopi.”
Tempo abo tabata mucha bo tabata gusta les of buki di historia? “Semper mi tawatin interes den historia. Mi a lesa masha hopi mes over di historia di arte, pero tambe tur historia cu ta encera Aruba. Tur chens cu mi tin of ora mi ta pinta mi ta pone un documentario di algo di historia specialmente historia di ‘The Sumerians, rise of civilization’. E historia antiguo ta fascina mi. Nos semper mester busca pa sa nos origen.”
Bo ta gusta historia como tema preferi pa bo lesa of pinta? “Vooral pa lesa of wak documentalnan. Tur momento mi kier haya sa algo nobo di nos pasado.”
Cua ta bo buki preferi cu ta conta algo di historia cu bo kier pa tur mucha lesa? “Mi ta kere cu nos mester lesa nos bukinan di historia mas tanto posibel. ‘Bouwen op de wind’ ta un cu mi ta recomenda pero e ta mas bien pa hende grandi, ‘Historia di Canashito’ y tur otro cu ta duna informacion di Aruba.”
Elvis a ilustra diferente buki di autor y poeta local. Entre otro ‘Carlito ta bay keiro’ di Gerry Franca, ‘Spoken, schurken en goudzoekers’ di Jacques Thönissen, ‘Yuwana biahero’ di Olga Croeze, ‘Magy ta conoce: Dufi, Shia y Ben : storia educativo pa mucha tocante tres mata di Aruba, druif, shimarucu y beishi (flor di sanger)’ di Mercedes Petrocchi, ‘Historia di Canashito’ di Dufi Kock, ‘E aventura di Bruno den Carnaval’ di Claudette Hoen, ‘E storia di Carlito y e tapadera’ di Gerry Franca, ‘Proverbionan’ di Digna Lacle-Herrera, ‘Bida di un mucha riba caya’ di Anthon van der Kolk, ‘Ryjean 1 y e Mago Sacabum’ di Henry Dabian, ‘Buki di poesia y storia’ di Digna Lacle-Herrera, ‘Elegante poeta’ di Clarette Quandus).
Elvis a bishita scol pa duna demostracion durante Festival di Buki pa Mucha algun aña pasa caba. E publicacion nobo aki a yega Aruba. Biblioteca kier encurasha maestronan pa scohe material y buki pa lesa cu mucha den klas. E tema ‘Historia’ ta duna hopi inspiracion y por bay den diferente direccion cu e tema. Ta keda na cada ken pa scohe pero nos por yuda cu esaki. Ta posibel tambe pa scolnan y maestronan haci uzo di e servicio di Mediateca Escolar. Bira miembro y busca material pa scol of klas na Mediateca escolar situa den e edificio principal na George Madurostraat 13.
Mail di poeta Frida Winklaar Domacassé: “Señor Elvis Tromp, Esta bunita obra cu ta keinta mi curason aki na tera friu. Ora mi a mira e misa di San Nicolas i su watertoren riba señor su cuadra, mi a corda mi hubentut na Lago Heights caya 900. Nos bisiñanan Ana Maria yu di Yaco Tromp cu tabata biba na caya 1000 tabata un di mi amiganan. Bunita recuerdo pa un ansiano, anto tur pa via di señor su pintura…
Cumindamento i deseando señor tur cos bon!
www.gedichtentij.nl