Pa semper den mi kurason
01/07/2022
Sicologo y escritora di buki pa mucha, sra. Achanty Damice-Thomasa di Corsou a bishita directora di Biblioteca Nacional Aruba pa entrega 5 ehemplar di su buki ‘Pa semper den mi kurason’. Esaki ta un buki pa mucha cu un tema special, luto. Djuni, e personahe principal ta perde su wela y ta masha tristo y ta haya hopi falta di su wela.
Achanty Thomasa ta Kinder- en Jeugdpsycholoog. Achanty ta splica su motivacion pa publica un buki: “Mi a lansa mi buki titulá ‘Pa semper den mi kurason’. ‘Pa semper den mi kurason’ ta skirbí pa muchanan di 7 te ku 12 aña ku ta pasando den e proseso di luto despues ku un ser kerí di nan a fayesé. Mucha no sa kon dil ku e proseso di luto akí na e manera korekto. Konsekuentemente nan por bira agresivo, pèrdè interes den vários aktividat i nan prestashon na skol ta bai atras. Tin biaha mayornan tambe ta den nan doló i no sa kon yuda nan mes te pa yuda nan yunan. Netamente pa e motibu akí mi a skirbi e buki akí.
Meta di e buki ta pa muchanan rekonosé ku no ta nan so ta di luto. Esaki por aliviá e proseso di luto. E ta tambe pa mucha i mayor por haña guia den e proseso di luto. A enfatisá tambe pa e buki ta na Papiamentu, komo ku e tópiko ta delikado i ta importante pa e ta den e mucha su idioma materno.”
Ilustracionnan colorido y bibo ta di Dalhaime Damice. Prologo ta di Valdemar Marcha. Revision final di texto: Merly Augusta. E publicacion ta di Request publishing cu ISBN 978-99904-5-257-0.
Pronto muchanan na Aruba por fia e buki na biblioteca publico. E ta obtenibel na Corsou na Mensing’s Caminada, Samsom, Bruna Kòrsou y Boneiru.
