Pa Un Bon Comienso di Aña
05/01/2024
Diaranson, 10 di januari 2024 di 6.30 p.m. pa 9.00 p.m. nos ta presenta e prome actividad pa aña 2024 ‘Pa Un Bon Comienso di Aña 2024’.
Gestor Cultural Mirto Laclé ta presenta un anochi cu un programa multidisciplinario titula ‘Pa Un Bon Comienso di Aña 2024’.
E anochi lo consisti di un programa cu actividadnan integra, esta musica, canto, baile, charla y presentacion. Riba programa como invitadonan special tin:
- Joyce Overdijk-Francis
- Ilustrado Vanessa Paulina
- Paula Engelen
- Grupo di Dande pa desea tur presente Un prospero Aña 2024
Sra. Joyce Overdijk-Francis lo elabora riba algun aspecto manera: E tempo colonial y desaroyonan di Structura Estatal, Sclabitud Trans-Atlantico/ Middle Passage, Resistencia, Libertad, Reconocimento, E historia Comun, Museo di Sclabitud.
Artista visual Vanessa Paulina ta presenta su trabou como ilustrado di e buki ‘Virginia, e rebelde di Aruba’. E buki ta conta e storia di Virginia, e rebelde di Aruba. Con e ta lucha pa su libertad y ta resisti contra opresion di su doño. Un storia di rebeldia, di resistencia y lucha contra inhusticia.
E obra Virginia, e rebelde di Aruba a keda produci pa escritor Jeroen Hoogerwerf y ilustrado Vanessa Paulina den cooperacion cu UNOCA y Biblioteca Nacional Aruba.
Sra. Paula Engelen ta duna un presentacion di e diferente show cultural musical cu el a yega di presenta como MC, Host, Event Organizer y PR music, y aki en particular musica di Famia Connor en general.
Lo tin presentacion di Grupo di Dande y Rey y Reina di Dande.
Laga nos bin hunto , disfruta y celebra. Entrada pa e anochi aki ta gratis. Pa mas informacion por tuma contacto cu Mirto Laclé, cel. 7426274
