Robby Solognier: ilustrador y Mural artist
18/10/2021
Robby Solognier ta nos colega y ta traha den Media como cameraman pero como cu e ta un persona cu por traha hopi cos (carpenteria y mas) y tambe e ta artistico, hopi biaha e ta yuda cu diferente otro proyecto. Den su tempo liber e ta entre otro Mural artist y e sa traha riba proyectonan manera instalacion pa Pasco riba rotonde den temporada di fin di aña. Dos man di oro Robby tin.
Robby a cuminsa cu Graffiti den añanan ochenta y esaki a desaroya den Mural art. Tin diferente Murals na San Nicolas di Robby y tambe den otro bario na Aruba. Robby su deseo ta pa un dia e traha Mural art riba e tanki di awa na Balashi. E tanki di awa aki ta posiciona riba un cero. Ya bo por imahina bo con esaki lo keda cu Robby su arte riba dje. Manera un landmark.
Mural artist Robby Solognier a decora e muraya di nos Teatro den aire liber. Robby a pone logo di biblioteca riba muraya den tur color. Robert (Robby) Solognier ta e artista cu pa hopi aña caba ta diseña e lomba di e stage pa apertura di e Festival di buki pa Mucha. Cada biaha Robby ta logra crea un imahen unico, alegre, tropical. E imahen nan cu Robby ta pinta ta conta un storia. Robby ta traha sea riba muraya of riba paneelnan grandi cu verf di acryl y ta usa e tecnica di airbrush. E aña aki Robby ta un di e ilustradornan di e Regalo di Siman di Buki ‘Bira loke bo kier!’
