Robert Reeberg
01/06/2018
Hopi esfuerzo ta wordo haci pa involvi tur mucha den lesamento y e celebracion di buki. Durante Festival di Buki pa Mucha ta purba di manda un mensahe pa tur mucha cu lesa ta dushi. Esaki pa medio di un festival cu musica, contamento di storia y presentacin di buki, autor y ilustrador. Mucha ta cera conoci cu e mundo di buki di cerca.
E cantica ‘Raar maar waar’ di e organisacion ‘Kinderen voor Kinderen’ a keda traduci na Papiamento pa Robert Reeberg. E cantica ta titula ‘Ra ra ra con por ta?’ Robert Reeberg ta yuda activamente cu e festival di buki pa mucha unda cu e por.
Robert a nace na Aruba y a traha casi 40 aña den enseñansa. Actualmente e ta gosando di su pensioen y e tin mas tempo pa dedica na su hobbynan, esta compone cantica pa mucha. Algun aña pasa el a traha un cantica caba pa e Festival di Buki pa Mucha titula ‘E mundo ta drey’. Recientemente Robert a saca un CD cu cantica pa mucha cu yama “Canta cu Alegria”. Robert ta toca guitara, e ta skirbi poesia pa mucha y pa hende grandi y e ta skirbi storia. Semper e tabata hopi creativo. El a skirbi hopi storia cortico cu e tawata uza den lesnan na scol. Tin diferente storia cortico cu el a publica den forma di buki. Cu su bukinan Robert kier stimula e muchanan pa lesa, pasobra segun Robert lesamento sigur sigur ta yuda pa habri e mente di mucha y ta laga e mucha bira mas inteligente.
Su prome publicacion tawata un traduccion di e cuenta di Alemania titula “Shete den un solo tiro”. Otro bukinan pa mucha cu el a publica ta ‘Tur pa mi, Cant’i lama’, ‘E anochi cu Sinterklaas a topa cu Santa Claus’, ‘Capa Blou’, ‘E hobby di Rino’, ‘E mago di Sero Teishi’, ‘Cindy Rella’, ‘Un bula den lama’ y ‘Roy ta Piet’.
Robert ta skirbi mas pa mucha pero e tambe tin obranan pa adulto manera e coleccionnan di poesia ‘Blo sunu y Man teni’.
Biblioteca Nacional Aruba ta contento cu por conta cu Robert pa bishita muchanan di scol pa stimula lesamento y pasa un rato agradabel. Robert kier stimula tur mucha pa lesa, pasobra banda di e hecho cu ta masha dushi pa bo drenta den e fanatasia di e storia, bo ta siña di dje y lo bo bay dilanti den bida.
Scroll To Top