Tio Ali
09/10/2020
Aña pasa, esta aña 2019, e Tio favorito di tur mucha, Tio Ali, a haci 25 aña. Dia 12 di mei di aña 1994, Alvin Inecia a cuminsa hunga e rol di Tio Ali. Pa por bira Tio Ali, Alvin ta bisti un camisa cu yama DASHIKI. E ta un paña un tiki hancho y di hopi color. Tio Ali ta bisti casi casi semper carson blanco. Masha poco biaha Tio Ali ta bisti carson di color. Y na pia Tio Ali ta bisti sandalia of gewoon sapato. Tio Ali ta yama tur hende homber Tio y tur hende muher Tanchi. Y e muchanan mes e ta yama DUSHI. Tin biaha tambe cu Tio Ali ta yama Mucha Muher “Galiña” y Mucha Homber “Yoncuman”.
Locual Tio Ali ta haci, nos ta yama: Entretene pa Educa. Pues Tio Ali ta haci cos leuk cu muchanan pa siñanan algo. Anto pa haci esey Tio Ali ta uza verso cu ta Rima, Ritmo, Zonido y Movemento. Pues Tio Ali ta uza Verso den cua tur palabra ta caba cu mesun zonido. Por ehempel Raton, Balkon, Carson, Diaranson. Pues: Kompa raton, Ta sinta den balkon, Ta laba su Karson, P’e haña/bisti Djarason.
Despues Tio Ali ta papia e palabranan ey cu hopi zjeito y den Ritmo pa asina e bira Ritmico. Anto banda di e zonido di su stem Tio Ali ta pone zonido di un instrument cu yama Tambu. Esey ta pone e piesa haña e nomber Poesia Ritmico. Esaki Tio Ali a siña cerca un otro Tio cu yama Richard Hooi. Tio Richard su nomber di artista tabata ‘Yerba Seku’. Y delaster Tio Ali a pone movemento hunto cu e ritmo. No movemento djis pa baila, pero movemento pa e mucha por haci loke e ta bisando den e poesia ritmico. Esey ta yuda cu e mucha ta siña loke Tio Ali trece mas liher. Pues pa un hende por yama mi Tio Ali, mi mester tin un Dashiki bisti, un carson blanco, un sandalia of sapato y un tambu den mi man of bou di mi brasa.
Tio Ali ta feliz di por participa den e Festival di Buki pa Mucha e aña aki atrobe, cu e dushi muchanan di Aruba cu semper a trata Tio Ali cu hopi, hopi, hopi Cariño y Amor. Na aña 2015 Tio Ali a saca un buki specialmente dedica na Scol y Muchanan di Aruba. Claro na docentenan tambe. E buki yama: “Mannan Di Futuro Di Aruba”. E buki ta completamente na Papiamento.
Un biaha un hende a puntra cua ta Tio Ali su transporte faborito. Y Tio Ali a contesta: “Pensamento”. Den pensamento Tio Ali ta bai tur caminda rond mundo. Y un caminda cu Tio Ali ta bai hopi biaha den pensamento ta Aruba. Specialmente scolnan di Aruba.
Scroll To Top