Paul Wong in a positive vibe
14/10/2022
‘Jair y e buriconan’ y ‘Gosa den naturalesa’ ta e 2 titulo di e buki cu Biblioteca Nacional Aruba ta presenta na muchanan di Aruba. E buki ta contene 2 storia. Ta pesey tin 2 titulo. Un edicion special pa e di 30 edicion di Festival di Buki pa Mucha. Cu orguyo biblioteca ta publica e buki pa mucha cu ta skirbi pa James Ocalia (Aruba) y ilustra pa Wouter Goudswaard (Hulanda) ‘Jair y e buriconan’. E otro banda di e buki ta ‘Gosa den naturalesa’ skirbi pa Evelien van Dort y ilustra pa Paul Wong (Aruba).
Paul ta considera cada proyecto cu e cuminsa un reto y e ta gusta pa e ta un challenge pa e por crece como artista y bira mihor. E no ta competi cu otro artista sino cu su mes pa cada biaha e por ta satisfecho y contento cu e obra. Esaki ta su soño, pa por traha riba proyectonan artistico y gana su pan al mismo tiempo. Pa cuminsa riba un composicion Paul ta busca imahen riba Internet como referencia y ta studia trabou di otro artista. E ta gusta naturalesa, principalmente bestia, como parti di e composicion pero e ta haci ‘portraits’ tambe. E gusta e estilo ‘hyper realism’. E ta habri pa inspiracion di otro artista y esaki ta motiva Paul pa sigui den su arte y tambe den e manera con e ta profila y promociona su mes. Tur esaki den un ‘positive vibe’, bon motiva. Cada obra ta unico y tin algo special.
Paul a bay Mon Plaisir College y despues ela bay studia arte na ‘The Art Institute of Fort Lauderdale’. Ela cuminsa hopi aña pasa cu imahen di Aruba pa print riba producto manera T-shirts y despues ela bay mas den direccion di cartoons y crea ‘cartoonlike characters’. Ta pesey a scohe Paul pa ilustra e buki di Festival di Buki pa Mucha edicion 30. Esakinan ta hopi leuk pa mucha!
Paul Wong a nace artista, semper pintando y dibuhando. Paul a nace na Aruba y su studio ta na Savaneta. Den dia Paul ta traha na AutoExcellence riba body di auto y akinan tambe e ta expresa su mes di un forma artistico. Paul ta domina diferente medio manera Airbrush, Acrylic y software pa yega na su obra. E ta pinta y airbrush brommer y auto tambe ‘Custom painting’. E ta yama su mes “Old skool bmx freestyle lover and minitruck enthusiast” riba su Instagram profile. Paul Wong ta participa den exposicion ‘Primary colors’ Y esaki ta habri te cu diahuebs dia 3 di november.
Scroll To Top